مسرحيــــــة ابطال من البوسنة ج2 تأليــــف محمد عبد الحميد خطاب

اللوحة الثانية

المكان : احد المغارات فى جبال مدينة روجاتسيا
ديكور : مغارة واسعة لا شئ داخلها سوى مساطب قليلة مفروشة بمفارش بسيطة وشموع تنير المكان … خريطة كبيرة معلقة على الحائط .. ومدخل فى المواجهة للجمهور ومدخلين جانبيين لحجرتين.. صورة على عزت بيجوفيتش معلقة بجوار الخريطة .
{ راجى احد رجال المقاومة يرقد على احد المساطب وبجواره الراديو يقلب فيه .. والسلاح بجوار الحائط .. بينما عامر ينظف سلاحه .. تبدو على عامر آثار المرض }
صوت الراديو : اتخذ مجلس الامن قرار بعمل مناطق منزوعة السلاح .. تحت إشراف الأمم المتحدة ..
راجي : الله أكبر
عامر : استني لما نسمع باقي الأخبار
صوت الراديو : من ناحية أخرى أودى قصف المدفعية لأحد أسواق بسرايفو يودى بحياة أربع وعشرون فردا
عامر : ( يغلق الراديو ) زودوا من قسوة العمليات ..
راجي : عشان يحققوا اكبر مكسب علي الارض وتبقي ورقة تفاوض مهمة في ايدهم
عامر : ويبيدوا أكبر عدد من السكان عشان يغيروا التركيبة السكانية
راجى : مسيرنا نحررك يا بوسنا … مسيرنا نروى أرضك من دم أعدائك
عامر : ( حزينا ) ازاى وهما كل يوم بيكسبوا ارض جديدة ويزيدوا قوة وإحنا بنزيد ضعف
راجى : خليك واثق فى عدالة ربنا .. وفى ارادتنا .
عامر : نفسى اعرف الامم المتحدة موقفهم مننا ايه بالضبط .. وايه اللى تقصدها بالمحميات دى .. يقصدوا بيها ايه
راجي : ده مصطلح بنسمعه لما يتكلموا عن الأماكن المحمية لحيوانات عددها قل أو مكان أثري هام خايفين عليه
عامر : وكأننا حيوانات خايفين عليها من الانقراض
راجى : لا وانت الصادق .. عاوزين يفرضوا الأمر الواقع علينا .. بحجة حمايتنا .
عامر : لا و انت الصادق .. عاوزين يحطونا زى الفراخ جوه أقفاص وساعتها نقبل بقراراتهم الظالمه او نواجه خطر الإبادة من الصرب .
راجى : خطة قذرة { يدخل شاكر مبتسما }
عمر: (لشاكر) أول مرة أشوفك مبتسم من أول الحرب
شاكر : جاى ومعايا ضيف قصدى صديق منتظرينه كلنا .
راجى وعامر : { معا } دينو { يدخل دينو يعانقانه }
عامر : اجمل مفاجاة لنا
راجى : سعيد بعودتك يا بطل
عامر : وعرفت تنفد منهم ازاى
شاكر : خليه ياخد نفسه الاول الراجل له ثلاث ايام بيهرب من مكان لمكان وعاوز يرتاح
دينو : و الراحة ح تيجى منين
عامر :ايه اللي حصل
دينو والدي وزوجتي اتقتلوا
راجي :البقاء لله
دينو : ونعم بالله
عامر : طيب و أمك و أختك
دينو : في الأسر .. وقعوا في ايد الكلاب
شاكر : يمكن عزاءك وعزائنا ان مش انت بس اللى خسرت ناس بتحبهم .. كل بيت بوسنى خسر أب وأم وأولاد..
راجي: ارفع راسك وحط ايدك فى ايدنا وتعالى ندافع عن وطنا
دينو : أنا كنت انانى فى احزانى .. وادى ايدى ممدوده اهيه { يسقط مغمى عليه }
شاكر : سبوه يرتاح { ينقله عامر وراجى على إحدى المصاطب }
عامر : باين عليه قاسى كتير .. اليومين اللى فاتوا
شاكر : الكل بيعانى { لراجي } هم الأخوات اللي لاقيناهم فى الجبال مستخبين أخبارهم إيه
راجى : حالتهم النفسية عاليه جدا .. وطلبوا تجنيدهم معانا
عامر : نضمهم لزملاءهم من المدافعين عن البوسنة
شاكر : بعد ما تتأكد من مدى اقتناعهم باشتراكهم فى الحرب .. ويكون بإرادتهم
عامر : طبعا .. طبعا
راجى : { مداعبا } بعد كده هنعلمهم فرقة لوحدهم { يضحكوا }
شاكر : تعالوا نخطط لعمليتنا الجديدة ..
عامر : و دينو
شاكر :سيبه ينام
{ يدخلوا جهة جانبية . اضاءة خافته بالمكان . دينو يتقلب فى نومه .. يظهر اسرة دينو }
دينو : والدى .. امى .. هاما .. نورا .. انتوا لسه عايشين .
فضيلة : احنا بخير
دينو : أكيد ده حلم
فاضل : كده برضه يابنى تهرب وتتخلى عن اهلك
دينو : غصب عنى يا والدى .. وجودى مكنش ح يفدهم .. بالعكس يمكن كنت ضعفت و بوحت بأسرار رجال .. بيفدوا بأرواحهم وطنهم
فضيلة : دينو أنت بطل .. وأنا فخورة بيك
نورا : أنقذنا يا دينو .. أنا وأمك محتاجين ليك
هاما : دينو ابنك بيرفسنى … الله حتى اسمع
دينو : { يضع اذنه على بطنها } باين عليه ولد
هاما : وداعا دينو
دينو : هاما
هاما : البوسنة
دينو : هاما
هاما : البوسنة
دينو : {يصحو من النوم مفزوعا . يعصر رأسه بيده } يارب مين يقدر يتحمل العذاب ده .. يارب الدم لوث ارضك .. والظلم بلغ مداه .. وجيوش المسلمين تايهة فى ظلام الخلافات ومعادش فيه معتصم ولا صلاح الدين يوحدنا { صارخا }ايدكم فى ايدنا يا مسلمين..الطوفان هيقضى على الكل واسلاماه .. واسلاماه
{ اضلام - اضاءه خافته . و تأتى حسناء حاملة كوب ماء. توقظه }
حسناء : يا اخ دينو …. قوم … { يقوم مفزوعا } استغفر الله … الظاهر انه كابوس
دينو : (ينظر اليها فى استغراب) هو ايه اللي حصل
حسناء : اللي بيحصل مع كل بوسني نفسه ينام في هدوء
دينو : كابوس
حسناء : اتعودنا عليه .. لو مجاش لينا كابوس منعرفش ننام (يبتسم) اهو كده
دينو : انتي مين .. متعرفتش عليكي
حسناء : انا حسناء اخت مجاهدة .. انضميت للمقاومة جديد {يتناول كوب الماء } انت عارف انا كل ما يجينى كابوس اقوم اصلى ركعتين لله .. ارتاح ..وأجدد نشاطي بالتدريبات العسكرية .
دينو : أزعجتكم
حسناء : لا أبدا.. أنا من كتر ما سمعت عنك من الزملاء قررت أتعرف عليك { صمت } واضح انك عانيت كتير .. بتبص لى كده ليه .
دينو : أصلك جميلة قوى { مستدركا } آسف لجرأتى .. بس
حسناء : { مقاطعة } ولا يهمك .. أنا دايما بسمع الوصف ده .. لحد ما بقى شئ عادى بالنسبة لى { مبتسمة } يمكن كنت زعلت لو ملاحظتش جمالى
دينو : فين باقى الزملاء ..
حسناء : اللى بيتدرب بره { بهمس } والقواد جوه بيخططوا للعملية الجديدة
دينو : وانت بتشاركى فى العمليات اللى بيقوموا بيها
حسناء : واضح انك شايف انى جميلة وبس .. انا شاركت فى عملية واحدة بس .. لحد دلوقتى .. ودى كانت فى روجاتسيا مدينتك { يبدو الحزن على دينو } .. اسفه انى دوست على الجرح بتاعك
دينو : الجرح مفتوح و ح يفضل ينزف لحد ما ارد اعتبارى
حسناء : ما تخليش الانتقام هو هدفك الاساسى .. وإلا ح يعميك عن قضيتنا الرئيسية وهى الدفاع عن الوطن
دينو : غصب عنى .. الجرح كبير قوى .
حسناء : أتعلم تعيش مع جرحك .. وحاول تشوف حاجة كويسه فى وسط الضباب والهلاك اللى بيواجهنا .
دينو : { يبتسم بمرارة } حاجة كويسة
حسناء : ايوه .. انا مثلا شايفة ان اللى بيحصل لينا .. كان السبب فى تقوية إسلامنا .. وان الحرب دى ابتلاء من ربنا بيختبر بيه صدق عقيدتنا
دينو : { باعجاب } انتى مين
حسناء : قلت لك .. حسناء
دينو : واضح ان الحرب قوة كل بوسني إلا أنا{ يدخل شاكر وعامر وراجى }
شاكر : { لدينو } اتعرفت على حسناء .. جميلة الجميلات .. وهية البطلة اللى فجرت مخزن الذخيرة فى روجاتسيا قرب بيتكم
دينو : مخزن الذخيرة ده هو اللى انقذنى
راجى : ازاى
دينو : لان الجنود انشغلوا فى الانفجار .. وبكده قدرت اهرب منهم
حسناء : يعنى
عامر : انتو اتعرفتوا ببعض قبل ما تشوفوا بعض { بيضحكوا }
شاكر : نظرا لبطولة حسناء .. بقينا نعتمد عليها فى أصعب العمليات
حسناء : دى ثقة غالية يا فندم

شاكر : انتى تستاهلى يابطلتنا .. ودلوقتى ح نديك يا دينو انت وحسناء فكرة عن عمليتنا اللى ح نقوم بيها .. طبعا عارفين المنطقة { يشير للخريطة } اللى بيتمركز فيها عدونا وسط الأشجار وناصبين مدافعهم على الجبال فى مواجهة مدينة سربينتشا .. استعدوا لغزوها
دينو : مش الامم المتحدة اعلنتها منزوعة السلاح
شاكر : الصرب .. ما بيحترموش اتفاقيات دولية .. فى المنطقة دى ( يشير لمكانها على الخريطة ) فيه مخزن ذخيرة واسلحة ..
عامر : مش دي مخاطرة كبيرة
راجي : كل شغلنا مخاطرة .. وجودنا علي ارض البوسنة مخاطرة
شاكر : احنا ح نستغل نشوة فرحتهم بالنصر فى روجاتسيا واحتفالتهم اللية دى .. و هناجمهم بقوة من ست الى ثمانى افراد و ح يكون معايا راجى فى القيادة
عامر : وانا
حسناء : وانا
دينو : وانا
شاكر : على مهلكم ياجماعة .. لو رحنا كلنا فى عملية واحدة .. ولا قدر الله فشلنا واستشهدنا … مين اللى ح يقود مجموعتنا .. انتوا ح تفضلوا هنا وعامر القائد فى غيابى .. تدرب المجموعة وتحضرها وتجهزها لاى عملية جديدة ومعاك دينو وحسناء ح يساعدوك .
عامر : العملية ح تستغرق قدايه
شاكر : ربنا وحده يعلم بس اذا ماجيناش فى خلال ساعة خطط للعملية الجديدة بمعرفتك .. وربنا يوفقكم { لراجى } يللا بينا
دينو : خد بالك من نفسك
شاكر : " وما تدرى نفس باى ارض تموت .. صدق الله العظيم " {يخرج راجى وشاكر }
حسناء : لما اخرج اتمم على زملائنا اللى بيتدربوا بره ( تخرج .اظلام )

تغير المشهد :
( حجرة نصف مضاءة يجلس دكتور زلاتان .. و أمامه طفل صغير يصرخ والدماء تنزف .. وهو يمسك سكين .. و الأم مقيدة
راكان : دكتور زلاتان ايه اللي توصلت ليه
زلاتان : القائد العظيم لمجموعة النمور الصربية في معملي .. ده شرف كبير
راكان : سمعت عن تجاربك الهايلة في مجال الحرب البيولوجية .. قولت أشوف بنفسي
زلاتان : ده شيء يسعدني
راكان : (يخرج سلاحه) الطفل ده صوته مزعج جدا
زلاتان : لا متقتولوش .. ده بيصرخ لاني أديته جرعة من سلاح بيولوجي هيخلص علي مسلمين البوسنة من غير نقطة دم
راكان : هايل .. الجرثومة دي هتتركب علي صاروخ وتترمي علي أي قرية بوسنية .. هتخلي شكلهم زي الطفل ده
زلاتان : ينزف دم من فمه و أنفه و أذنه و عينيه زي ما انت شايف الطفل ده
راكان : يدور حول الطفل النازف .. منظره هايل .. تحفه فنية .. بس يا خسارة الامم المتحدة ومجلس الامن فتحوا عينهم علينا ورجليهم هتحط هنا قريب .. لعد ما بدأوا ينتشروا بطول البلاد وعرضها
زلاتان : من الناحية دي اطمئن
راكان : ازاي
زلاتان : لان بعد 24 ساعة من التعرض ليها بتختفي آثارها من الجسم تماما وميبقاش ليها أي أثر
راكان : لو كلامك صح يبقي أنقذت شعب الصرب المختار من الابادة علي يد أتراك كلاب
( يعلوا صراخ الطفل . يخرج راكان سلاحه ويقتله )
زلاتان : (غاضبا) ايه ده كنت عاوز اشوف المراحل كاملة
راكان : مراحل ايه
زلاتان : مراحل تطور أثر الفيرس عليه
راكان : بس كده (ينادي) ميكولا
ميكولا : أيوه يا قائد باكان(يسقط علي الارض)
راكان : قوم يا غبي .. فيه جندي صربي يقع علي الارض بالشكل ده
ميكولا : بعتذر لاني وقعت بشكل مضحك .. وبعدين ما حضرتك وقعت هناك عند التبه في
راكان : اخرس (يحاول ضربه . يمنعه زلاتان)
زلاتان : سيبه يا راكان
راكان : نادي القائد باليتش
ميكولا : حاضر يا فندم (يخرج)
راكان : باليتش اللي جاي ده من اشرس المقاتلين .. هيقدر يجيب ليك كل اللي تحتاجه (يدخل باليتش وخلفه ميكولا)
باليتش : حضرة القائد العظيم راكان .. قائد مجموعة النمور الصربية
راكان : اهلا بضابطنا الهمام .. كنا عاوزين المجموعة اللي اعتقلتها في روجاتسيا .. دكتور زلاتان عنده عجز في الاشخاص اللي بيعمل عليهم تجارب كيماوية
باليتش : بس دول راحو للمستشفي الميداني .. عشان ناخد أعضائهم لعلاج ابناء شعبنا المختار
زلاتان : وفيه مجموعة وديتها لمعسكر سونيا
باليتش : دول للترفيه عن جنودنا وخدمتهم
زلاتان : وفيه مجموعة اللي اسرتوها في زافيدوفيتش
راكان : واضح ان دكتورنا الهمام مهتم جدا بعملياتنا
زلاتان : بتابعها يوميا .. أصل ليه مجموعة كونتها من اعتي العصابات الاجرامية واشدها فتكا مهمتها صيد مسلمين البوسنة
باليتش : فيه مجموعة اللي عايشة من قرية زافيدوفيتش بيقوموا بحفر الخنادق لجيوشنا
راكان : هات عينة من كل سنة للدكتور عشان ابحاثه مهمة جدا
ميكولا : دكتور زلاتان
زلاتان : قول ميكولا
ميكولا : ممكن تعمل عليه تجارب
باليتش : فكرة هايلة
راكان : ياه للدرجة دي عاوز تخلص من حياتك
ميكولا : هو دكتور زلاتان قاتل
باليتش : (يصفع ميكولا) اخرس
ميكولا : انت كل شوية تتضربني
باليتش : لانك غبي
زلاتان : سيبه .. ميكولا حبيبي وميقصدتش اساءة
ميكولا : بكره ابقي ضابط واضربك بالقلم (يهم باليتش بصفعه . يمنعه راكان)
باليتش : شايف قلة أدبه
زلاتان : بص يا ميكولا .. أنا قاتل صحيح بس لاعدائنا .. يرضيك انهم يبيدونا
ميكولا : بس انت دكتور
زلاتان : صحي وابحاثي لخدمة شعبنا الحبيب
ميكولا : (يشير للطفل) بس انتي قتلت الطفل من غير رحمة
زلاتان : الطفل ده ضحي بحياته من اجل خدمة ابحاثنا
ميكولا : هو اللي طلب ده
باليتش : وبعدين
ميكولا : هقول للقائد راكان ان دينو هرب منك
راكان : ايه .. صحيح الكلام ده
باليتش : صحيح .. بس مسيري امسكه
راكان : تمسك مين .. انتي متحول للتحقيق
ميكولا : هيه
راكان : (لميكولا) و انت كمان
ميكولا : وانا عملت ايه
راكان : مبلغتش القياده ليه
باليتش : اديني فرصة يا فندم و أنا امسكه
راكان : لا انت هتمسك معسكر سونيا .. طبعا بعد ما يتحقق معاك .. ومسير دينو يقع في ايدينا ,..من الواضح ان فكرتي عنك غلط
باليتش : معسكر سونيا
راكان : آه
باليتش : اللي تشوفه يافندم
راكان : متنساش العينات
(صوت اطلاق نار . يدخل جندي)
راكان : ايه ده
جندي : قوة من العدو قربت
راكان : (لباليتش) جم لموتهم
(اظلام . اطلاق نار . يدخل راجي وشاكر )
شاكر : لاقيت حد منهم
راجي : زي ما يكونوا اتبخروا
شاكر : ازاي المعلومات أكيدة انهم هنا
راجي : (يشير لجثة الطفل) شايف اللي انا شايفه
شاكر : ايه الوحشية دي
راجي : الدم نازف من كل حته في جسمه
شاكر : دي تجارب الدكتور زلاتان البيولوجية القذرة علي ابنائنا
راجي : دول بشر
شاكر : لايمكن حتي يكونوا حيوانات
راجي : يا ما نفسي اعمل علي المجرم زلاتان تجارب من النوع ده
شاكر : الكلام مش هيفيد .. يللا ندفن الطفل البريء ده .. ونواصل بحثنا عن المجرمين زلاتان وراكان
راجي : (يحمل الطفل) الله يرحمك يا ابني (يخرجوا)

تغير المشهد :

عامر : { لدينو } كنت عاوز اقولك سر بس توعدنى الاول ما تجبش سيرة لحد
دينو : اوعدك { صمت } سر ايه
عامر : انا مريض من فترة(ينظر حوله)عندى تليف فىالكبد{ دينو بيندهش } وكنت مخبى مرضى عشان الزملاء مايستبعدونيش من المقاومة .. وانت عارف حاجة زى دى لو حصلت انا ممكن اموت قبل ميعادى .
دينو : بس اللى بتعملة فيه خطر على حياتك
عامر : حياتى مالهاش لازمة .. ووطنى محتل .. اسمع يا دينو انا مش باقولك كده علشان تدور ليه على حل .. وللا تقولى على اللى اعملة انا باقولك كده علشان { يعطيه جواب } تخلى الوصية معاك لو مت فى اى وقت .. تديها لابنى
دينو : عارف مكانه
عامر : مدينة سربينتسا .. عندى امل انه ح يعيش وانك هتلاقيه
دينو : { باستغراب } اوعدك ..
{ حسناء تدخل ومعها مجموعة من الفتيات والفتيان يبدو عليهم اثار السهر والجوع والخوف }
حسناء : { لدينو } كانوا مستخبين فى الغابات اسبوع كامل لحد ما عترنا عليهم بالصدفة وعاوزين ينضموا لينا , عامر : اهلا يا ابطال
دينو : انتوا بين اهلكوا واخواتكم
فتى : انتوا عندكم اكل
فتاة : اصلنا جعانيين لينا ايام .. تعبنا من عدها .. بناكل ورق الشجر وبنشرب لا مؤاخذه
فتى : ( مبررا ) احسن من الموت
عامر : خلو التفاصيل دى بعدين .. انتو ح تروحوا مع اختكم حسناء .. ح توفر ليكم كل حاجة عاوزينها
حسناء : ( برقة ) يللا بينا
(يخرجوا معاها )
دينو : اطفال صغار وبنات فى عمر الزهور .. خطفتهم الحرب من حضن البراءة
عامر : يمكن الحرب فرضت علينا وعلى ابنائنا درس كان لازم نتعلمه من زمان
دينو : اى درس
عامر : البقاء للاقوى .. هو ده الدرس اللى اصبح فرض نعلمه لابنائنا .. لكن لو كنا استعدينا للحرب دى من بدرى .. وعملنا خلايا مقاومة قبل ما نطلب الانفصال . كان الحال اتغير
دينو : ومين كان ح يمدنا بالسلاح .. دول كانوا قافلين الحدود وحرمينا من حقوقنا المدنية . وحتى العسكرية .. اعلى رتبة لمسلم هى ضابط ونادرا ما زادت عن كده . يعنى الخبرة العسكرية . غير موجوده . مفيش غير اللجوء لتجار السلاح والمافيا .. ودى بتطلب مبالغ هائلة .. مين ح يمدنا بيها والدول الاسلامية اما خاضعة لنفوذ اجنبى بيحركها زى ما هو عاوز .. او دول فقيرة وضعيفة او .. { تدخل حسناء }
عامر : مكتوب على امتنا تبقى مداس للكلاب والاندال { صوت انفجار }
دينو : الابطال عملوها الجميع الله اكبر
حسناء : امتنا عمرها ما ح تبقى مداس لو اعتصمنا بحبل الله واتحدنا .. و الدليل على كده وجود مقاتلين انضموا لخلايا المقاومة المختلفة .. من الدول الاسلامية وبيحاربوا ببسالة
عامر : فكرتينى فيه دفعه من المقاتلين الاجانب هتنضم لينا قريب .. و لازم حد يكون فى استقابلهم . بس لازم نتاكد من نواياهم الاول قبل ما يشتركوا معانا فى الحرب
دينو : امتى جايين
عامر : بعد يومين { صمت } فى حالة فشل مهمة زملائنا ح يستنى حد منكم هنا لاستقابلهم
دينو : انا لازم اشارك
حسناء : وانا { صمت } وبعدين انت بتفرض ليه الاسوا .. ابطالنا ح يجوا غانمين ان شاء الله
عامر : دى امنيتى .. بس فى الحرب توقعى الاسوا .. واتصرف على اساسه
دينو : خطط بديلة يعنى { صوت طلقات رصاص }
حسناء : بمناسبة الخطط .. ايه الهدف القادم
عامر: كله متوقف على نجاح زملائنا .. { صمت . لحسناء } دخلى عناصر المقاومة اللى ح تشارك معانا فى العملية { مجموعة مسلحة من الشباب والفتيات والفتيان .. بيدخلوا فى صف منتظم والتزام عسكرى . لدينو } مجموعة من الابطال ح يشاركونا العملية الجديدة { للجنود } اعرفكم بدينو مقاتل اكيد بعضكم يعرفوا .. او شارك فى احد العمليات اللى قام بيها
دينو : انا سعيد بالتعرف عليكم .. واتنمنى التوفيق لينا ولزملائنا { مداعبا } وان كنت ملاحظ ان عدد الفتيات بدا يزيد فى المقاومة .. مش الحرب خطر عليكم
رضوى : { باعتزاز } الحرب ما بتفرقش بين راجل وامرة .. احنا بنتعرض للتعذيب الجسدى والنفسى اكتر
شيماء : الجيش الصربى بيعتبرنا غنائم حرب .. سبايا ووسائل ترفيه
دينو : انا اسف . مقصدش انى اضايقكم بكلامى { يلتفت للفتيان } ياولاد انتو مش خايفين
الفتيان : لا .. احنا ابطال
دينو : { يتقدم من حميد } انت اسمك ايه
حميد : انا المقاتل حميد .. شاركت فى عملية فدائية والحمد لله اثبت كفاءتى
دينو : عظيم .. سنك كام
حميد : ستاشر سنه .. لكن اهزم ستاشر جندى صربى جبان
دينو : اهلا بيكم يا مستقبل البوسنة { لعامر } ما ضاع حقه وراءه ابطال مؤمنين به
عامر : { ينظر فى ساعته } فاضل ساعة وخمس دقائق وثلاثين ثانية ويصل اخوانا سالمين باذن الله { يدخل شاكر وراجى ومجموعة من المقاتلين وقد صبغوا وجوههم جميعا } الابطال وصلوا { الجنود يهللون . زغاريد } حمد الله على سلامتكم
شاكر : كانت لحظات قاسية
راجى : { بحماس } بس قدرنا بفضل الله .. ندوقهم مرارة الهزيمة
دينو : الله اكبر { الجميع يرد } الله اكبر
الجميع : الله اكبر
شاكر : عامر متهيالى انك تريح نفسك المرة دى كمان لحد ما تتعافى
عامر : { بغضب } لا انا ح شارك ..ارجوك سيبنى ادى دورى نحو وطنى
شاكر : انت عنيد { يحضنه } بس بطل
عامر : دمرتوا المعسكر
شاكر : واسرنا كل اللى تبقى منهم على قيد الحياة
راجى : مش بس كده .. احنا قدرنا نحصل على ذخيرة وسلاح منهم .. تعوض اللى فقدناه فى العمليات اللى قومنا بيها
الجميع : الله اكبر
شاكر : إقراؤ الفاتحة على روح زملائنا اللى فقدناهم فى العملية دى
{ يرفعوا ايديهم . يقرؤا }
دينو : ما لاقتوش حد من اهلى فىالمعسكر الصربى
شاكر : للاسف اول ما هجمنا .. قتلوا الاسرى .. واللى عاش مات اثناء القتال انا اسف {صمت } بس معنا فى الاسرى اتنين كانوا مشاركين فى العمليات الاجرامية فى شيلدوفيتشى وروجاتسيا . يمكن تقدر تتعرف عليهم او يفيدونا بحاجة عنهم
دينو : { بلهفة } اشوفهم
شاكر : { لراجى } خليهم يدخلو ا { راجى ياتى بهم . جنديين اثار الحرب بادية عليهم . مذعورين )
اسير [ 1 ] : احنا تحت امركم . بس اتركونا نعيش
اسير : [2 ] ح نقول كل حاجة عاوزين تعرفوها
دينو : { يتفحص اسير1 . يمسك بتلابيبه } انت كنت مع المجموعة اللى هاجمت بيتنا
اسير[1] : { بخوف } هو انت .. انا ماليش دعوة .. انا كنت بانفذ الاوامر
دينو : عملتوا ايه فى اهلى { شاكر يخلص الاسير من دينو }
شاكر : اهدا .. انا ح اعرف اخليه يقول كل حاجة .. بس اهدا { للاسير } اسمع لو قلت كل حاجة تعرفها عن اهل دينو ح ترجعوا لاهلكم بسلام . اما لو ..
اسير [ 1 ] : { مقاطعا } ح اقول .. والدته واخته لسه على قيد الحياة
دينو : الحمد لله
شاكر : يعنى ما كانوش فى المعسكر ساعه ما هاجمناه
اسير [ 2 ] : لا
شاكر : راحو فين { يصمت الاسير . مهددا } شكلك مش عاوز ترجع لاهلك
اسير[1 ] : الاشكال بتتشابه علينا .. والاسرى كتير هنفرق بينهم ازاى
شاكر : ح ترجع للغموض تانى
اسير[1] : انا هاقول لحضرتك .. انا كنت موجود لما هاجمنا بيته { يشير لدينو } وجريت وراه لما هرب .. والحق انا تعبت من الجرى وراه قلت ارجع للضابط وابلغه لكنى خفت
شاكر : { مقاطعا } من غير تفاصيل كتيره ودتوهم فين
اسير [1]: معسكر سونيا { صمت } واحد من الضباط اخدهم المعسكر هناك عشان { صمت } انت عارف ان باليتش بيكرهك بشكل خاص لان هروبك خلاهم يوقفوه عن المشاركة فى العمليات الحربية
دينو : لازم اخلصهم من ايديه
شاكر : كده من غير خطه
دينو : كل دقيقة بتمر فيها خطر على اهلى
اسير[ 1] : ح تسيبونا نعيش
اسير [ 2 ]: احنا قولنا كل حاجة .. مش كده
شاكر : { لاحد جنوده } خدهم بره دلوقتى
اسير :[1 ] { وهو خارج } المسلم بيفى بوعده .. مش كده
شاكر : كده ياعامر انت عارف العملية الجديدة فين
عامر : معسكر سونيا
شاكر : صح .. فيه صعوبة فى المعسكر ده
دينو : مهما كانت الصعوبة .. .. ح اقوم بالعملية دى
شاكر : ماتخليش العواطف تغلبك . انت لو مت وانت بتحاول تنقذ اهلك تبقى ماعملتش حاجة .
حسناء : { لشاكر} ايه الصعوبة فى العملية
شاكر : { يتجه للخريطة } دى فى الحقيقة عبارة عن مدرسة محاطه بحراسة شديدة اسمع ان هناك عدد هائل من المعتقلين .. اللى بيواجهوا اشد انواع التعذيب .. والوصول للمعسكر محفوف بالمخاطر .. لذا يجب الحذر الشديد .
عامر : ممكن بالضغط على الولاد دول.. نعرف منهم نقاط الضعف والقوة فى الحراسة حوالين المدرسة
شاكر : هاتهم حجرة الاجتماعات .. عشان نشوف ح نخترق المدرسة دى ازاى
{ يخرج شاكر وعامر وراجى ودينو وحسناء }
رضوى : { لشيماء } انا عوزاك فى كلمة { تنتحى به جانبا } انا خايفة
شيماء : خايفة من ايه
رضوى : من الموت
شيماء : خلاص خليك هنا .. وبرضه ح تخدمى المقاومة
رضوى : بس انا عاوزة احارب .. نفسى اشارك فى تحرير بلادى
شيماء : حيرتينى معاك { مطمئنة } عارفه الموت فى عملية زى دى معناه ايه
رضوى : ايه
شيماء : الشهادة . تدخلى الجنة مع الابرار والصالحين بعيد عن الحروب والصراعات والاحقاد .. فى جو كله حب ووئام
رضوى : { تردد بسعادة } الشهادة .. نفسى انول الشهادة { بتردد } بس فيه نوع من الموت اصعب من الموت نفسه
شيماء : هو الموت بقى انواع
رضوى : الاغتصاب .. انتى عارفه لو وقعنا فى ايديهم هيحصل لينا ايه
{ حالة من الوجوم تصيبهم }
رضوى : عاوزك توعدينى بحاجة
شيماء : ايه هيه
رضوى : اوعدينى الاول
شيماء : اوعدك
رضوى : لو لاقتينى وقعت فى ايديهم .. تقتلينى
شيماء: ( باستغراب) اقتلك بس
رضوى : اوعدينى .. وانا برضه اوعدك انى ح اقتلك { تنظر اليها شيماء بتعجب } لو وقعتى فى ايدهم
حميد : { يقترب من شيماء } انتى فيكى شبه كبير من اختى
شيماء : أنا يسعدنى أنى أكون أختك
رضوى : هيه أختك فين دلوقتى
حميد : ماتت .. او بمعنى اصح اتقتلت
رضوى : انا اسفة … وارجوك تعتبرنا اخواتك
حميد : انا راجل .. واختى ماتت شهيدة … واهلى كمان
رضوى : احنا اهلك
{ يدخل شاكر ودينو وراجى وعامر وحسناء }
شاكر : { المجموعة } عرفتوا ح تعملوا ايه
دينو : باذن الله ح نتوفق
عامر : { للمجموعة } جاهزين
الجميع : جاهزين { يخرجوا جميعا }

نشرت في المصري اليوم